الثلاثاء، 23 أبريل، 2013

 
البنت اللي 
بتسأل عليك كل يوم 
وبتنسى فـ كلامها الهموم 
مهما آسيت .. أو إتجرحت 

وعرفت صدفة منها ..إنها 
شايلة صورة حلوة ليك 
على تليفونها 
عشان تشوفك بقلبها 
وكمان عيونها 
مهما غبت .. ومهما رحت 

وكشكولها اللي كاتبه فيه 
عنك كتير 
خاصة إنك بجد 
حبها الأولاني والأخير 
ومخبياه وسط الكتب 
في درجها اللي تحت 

وسهرها قبل النوم ساعات 
بتفتكر كل الحجات 
اللي لما حكتها ليك 
حستك فعلا فرحت 

البنت دي 
بتحب فعلا بقلبها 
ودموعها دايماً 
أسهل إجابة عندها 
سواء فـ فرح أو فـ حزن 
.. البنت دي 
لازم تقدر حبها 
لازم تقرب منها 
ومشاعرها دي 
يحضنها قلبك .. أحلى حضن 

بداخل كل إنسان عالم ... لكن القليل جدا من يكتشف روعة عالمه