الأربعاء، 22 مايو، 2013





كل واحد فينا داخله ميت  قصه وقصه 
وألف ليله وليله 
داخله ألف كتاب 
ومخه يتكلم ما يسكت 
ومستمر في التدوين 
تدوين الماضي اللي ابتدى يبهت 




سألت أمي : يما.. باقي كم على رمضان ؟!
بس الظاهر ان امي كانت مشغوله او مش مركزه فما ردت 
عدت السؤال عادي بدون يأس وبمنتهى الزن .. 
يما ... يما ... يما.. 
ردت  : هاااااااااا نعمممم 
قلت  كم باقي  ويجي رمضان .. 
قالت شهر وشويه ..
وسرحت انا بخيالي .. 
وتخيلت السفره على طول  
والسمبوسه والشوربه والرز 
ومكاني اللي اختاره اللي لازم يكون 
موقعه استراتيجي ..
يطل على صحن المحشي والشوربه 
ويفضل أن يكون بعيدا عن الماي والفيمتو 
عشان لو قعدت جمب الماي 
تقريبا راح يخلص الفطور
وانا اسمع ..سميه صبي .. صبي 
ميت مره 
..وكل واحد ومقاديره الخاصه .. 
صبيلي نص الكاسه 
صبيلي وخلي ثلجتين ينزلون ف الكاس ؟!
امي طبعا  تقول ..سميه صبي لي نقطه ؟!
اصب نقطه ؟
طيب كيف تجي نقطه ؟
ساعات استهبل وارجعلها الكاس فاضي  
ترجع تقول نقطه يعني شويييييييييه يا بنت صبي خلصينا 
:)
سرحت بخيالي لصوت الامام في صلاة التراويح 
والأمهات اللي دايما يجيبون عيالهم معاهم في المسجد 
ويقعدون يلعبون .. ويسوون ازعاج 
ولازم في كل مره وحده تقوم تعطي محاضره للأمهات 
عن ان جنة الأطفاال مناااازلهم ... 
ويجي ثاني اليوم :) و العيال يزيدون ..عادي جدا 
:)
سرحت بخيالي 
لاحساسنا في رمضان  ..
الصلاة غير ..
والدعاء غير .. 
وكل شيء له طعم غير ..

اللهم بلغنا رمضان  ...  آمين 





السكته القلبيه !!


بداخل كل إنسان عالم ... لكن القليل جدا من يكتشف روعة عالمه